ᠴᠦ᠋ ᠬᠠᠶᠠᠬᠤ
 |
ᠪᠡᠯᠭᠡ |
ᠴᠦ᠋ ᠬᠠᠶᠠᠬᠤ ᠲᠣᠭᠯᠠᠭᠠᠮ ᠪᠣᠯ ᠠᠷᠠᠳ ᠣᠯᠠᠨ ᠢ ᠬᠠᠮᠤᠷᠤᠭᠰᠠᠨ ᠬᠥᠭᠵᠢᠶᠡᠨᠲᠦ ᠲᠣᠭᠯᠠᠭᠠᠮ ᠶᠤᠮ᠃ [1] ᠴᠦ᠋ ᠬᠠᠶᠠᠬᠤ ᠶ᠋ᠢ ᠪᠠᠰᠠ ᠴᠠᠭᠠᠨ ᠮᠣᠳᠣ ᠬᠠᠶᠠᠬᠤ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠡᠨᠡ ᠲᠣᠭᠯᠠᠭᠠᠮ ᠢ ᠵᠤᠨ᠂ ᠨᠠᠮᠤᠷ ᠤᠨ ᠳᠤᠯᠠᠭᠠᠨ ᠦᠳᠡᠰᠢ ᠰᠠᠷᠠᠨ ᠤ ᠰᠠᠷᠠᠭᠤᠯ ᠳᠤ ᠲᠣᠭᠯᠠᠨᠠ᠃ ᠰᠥᠨᠢ ᠬᠥᠳᠡᠭᠡ ᠨᠤᠲᠤᠭ ᠲᠤ ᠬᠣᠲᠠ ᠠᠶ᠋ᠢᠯ ᠠᠴᠠ ᠵᠢᠭᠠᠬᠠᠨ ᠵᠠᠶ᠋ᠢᠳᠠᠭᠤ ᠣᠯᠠᠨ ᠬᠦᠮᠦᠨ ᠢᠢᠰᠢ ᠲᠡᠶ᠋᠋ᠢᠰᠢ ᠲᠠᠷᠠᠨ ᠶ᠋ᠠᠭᠤᠮᠠ ᠬᠠᠶ᠋ᠢᠵᠤ ᠪᠠᠶ᠋ᠢᠭᠰᠠᠨ ᠢᠶ᠋ᠠᠨ ᠨᠢᠭᠡ ᠶ᠋ᠢ ᠪᠡᠨ ᠪᠠᠷᠢᠵᠤ ᠠᠪᠬᠤ ᠭᠡᠳ ᠬᠥᠭᠡᠭᠡᠨ ᠭᠦᠶᠦᠵᠦ ᠪᠥᠭᠡᠮ ᠳᠠᠭᠤᠤ ᠱᠤᠤᠭᠢᠶᠠᠨ᠂ ᠢᠨᠢᠶᠡᠳᠦ ᠪᠣᠯᠵᠤ᠂ ᠬᠠᠷᠢᠨ ᠵᠠᠷᠢᠮ ᠨᠢᠭᠡ ᠨᠢ ᠪᠠᠭᠠᠬᠠᠨ ᠰᠢᠯᠪᠤᠷᠬᠠᠢ ᠮᠡᠲᠦ ᠶ᠋ᠢᠨ ᠭᠡᠮᠲᠦᠯ ᠠᠪᠴᠤ᠂ ᠵᠠᠷᠢᠮ ᠨᠢ ᠰᠢᠷᠦᠭᠦᠨ ᠮᠠᠷᠭᠤᠭᠠᠨ ᠡᠭᠦᠰᠬᠡᠵᠦ ᠪᠠᠶ᠋ᠢᠬᠤ ᠶᠤᠮ᠃ ᠲᠡᠳᠡᠨ ᠦ ᠳᠤᠮᠳᠠ ᠠᠴᠠ ᠬᠡᠨ ᠨᠢᠭᠡ ᠨᠢ ᠬᠤᠷᠳᠤ ᠬᠦᠴᠦ ᠪᠡᠨ ᠠᠰᠢᠭᠯᠠᠨ ᠰᠤᠭᠤᠷᠠᠨ ᠭᠠᠷᠴᠤ ᠭᠦᠶᠦᠭᠰᠡᠭᠡᠷ ᠬᠦᠷᠴᠦ ᠢᠷᠡᠭᠡᠳ᠂ ᠨᠢᠭᠡ ᠬᠠᠭᠠᠯᠤᠭᠰᠠᠨ ᠲᠦᠯᠡᠭᠡᠨ ᠦ ᠳᠠᠶ᠋ᠢᠲᠠᠢ ᠮᠣᠳᠣ ᠠᠪᠴᠢᠷᠠᠵᠤ ᠨᠢᠭᠡ ᠬᠦᠮᠦᠨ ᠳ᠋ᠦ ᠥᠭᠭᠦᠨᠡ᠃ ᠡᠨᠡ ᠮᠣᠳᠣ ᠠᠪᠴᠤ ᠢᠷᠡᠭᠰᠡᠨ ᠬᠦᠮᠦᠨ ᠦ ᠪᠠᠭ ᠡᠨᠡᠬᠦ ᠲᠣᠭᠯᠠᠭᠠᠮ ᠳᠤ ᠬᠣᠵᠢᠵᠤ ᠪᠠᠶ᠋ᠢᠭᠠ ᠶᠤᠮ᠃
ᠲᠣᠭᠯᠠᠭᠠᠮ ᠤᠨ ᠵᠣᠷᠢᠯᠭᠠ[засварлах | кодоор засварлах]
 |
ᠴᠦ᠋ ᠮᠣᠳᠤ ᠬᠠᠶᠠᠭᠰᠠᠨ ᠤ ᠳᠠᠷᠠᠭᠠ |
ᠴᠦ᠋ ᠬᠠᠶᠠᠬᠤ ᠨᠢ ᠰᠥᠨᠢ ᠶ᠋ᠢᠨ ᠴᠠᠭ ᠲᠤ ᠬᠣᠶᠠᠷ ᠪᠠᠷᠢᠮ ᠣᠷᠴᠢᠮ ᠬᠡᠮᠵᠢᠶᠡᠨ ᠦ ᠮᠣᠳᠣ ᠶ᠋ᠢ ᠰᠢᠳᠡᠵᠦ᠂ ᠲᠡᠭᠦᠨ ᠢ ᠡᠷᠢᠵᠦ ᠤᠯᠬᠤ᠂ ᠪᠤᠯᠢᠶᠠᠯᠳᠤᠨ ᠲᠡᠮᠡᠴᠡᠯᠳᠦᠬᠦ᠂ ᠮᠣᠩᠭᠣᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠲᠤ ᠨᠢᠭᠡᠨ ᠵᠦᠢᠯ ᠲᠣᠭᠯᠠᠭᠠᠮ᠃[2]
- ᠴᠠᠭᠠᠨ ᠮᠣᠳᠣ ᠬᠠᠶᠠᠶ᠋ᠠ ᠠ᠋! ᠭᠡᠵᠦ ᠬᠠᠰᠬᠢᠷᠬᠤ ᠳᠤ ᠬᠣᠲᠠ ᠰᠠᠭᠠᠬᠠᠯᠲᠠ ᠶ᠋ᠢᠨ ᠬᠡᠦᠬᠡᠳ ᠦᠳ᠂ ᠲᠣᠮᠣᠴᠤᠤᠯ ᠴᠥᠮ ᠴᠤᠭᠯᠠᠵᠤ ᠢᠷᠡᠵᠡᠭᠡᠨ ᠬᠣᠶᠠᠷ ᠲᠠᠯᠠ ᠪᠣᠯᠤᠨ ᠲᠣᠭᠯᠠᠳᠠᠭ ᠪᠠᠶ᠋ᠢᠵᠠᠢ᠃ “ᠴᠦ᠋᠌” ᠮᠣᠳᠣ ᠶ᠋ᠢ ᠋ᠴᠥᠭᠡᠯᠡᠳᠡᠭᠴᠢ ᠬᠠᠶᠠᠭᠰᠠᠨ ᠤ ᠳᠠᠷᠠᠭᠠ ᠲᠣᠭᠯᠠᠭᠴᠢᠳ ᠤᠨᠠᠵᠤ ᠣᠶ᠋ᠢᠴᠢᠬᠰᠠᠨ ᠴᠢᠮᠡᠭᠡ ᠪᠡᠷ ᠨᠢ ᠶᠠᠪᠤᠵᠤ ᠡᠷᠢᠵᠦ ᠣᠯᠤᠨᠠ᠃ ᠣᠯᠤᠭᠰᠠᠨ ᠴᠦ᠋᠌ ᠪᠡᠨ ᠬᠣᠶᠠᠷ ᠲᠠᠯᠠ ᠪᠤᠯᠢᠶᠠᠴᠠᠯᠳᠤᠵᠤ ᠠᠯᠢ ᠬᠦᠴᠦᠲᠡᠢ ᠨᠢ ᠠᠪᠴᠤ᠂ ᠴᠥᠭᠡᠯᠡᠳᠡᠭᠴᠢ ᠳᠦ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠢᠶ᠋ᠡᠷ ᠬᠣᠵᠢᠨᠠ᠃
ᠲᠣᠭᠯᠠᠭᠠᠮ ᠤᠨ ᠳᠦᠷᠢᠮ[засварлах | кодоор засварлах]
 |
ᠴᠦ᠋ ᠮᠣᠳᠤ ᠶ᠋᠋ᠢ ᠬᠠᠶᠠᠵᠤ ᠪᠠᠶ᠋᠋ᠢᠭᠠ ᠨᠢ |
ᠵᠤᠨ᠂ ᠨᠠᠮᠤᠷ ᠤᠨ ᠳᠤᠯᠠᠭᠠᠨ ᠴᠠᠭ ᠲᠤ ᠰᠠᠷᠠ ᠲᠠᠢ ᠰᠥᠨᠢ ᠦᠬᠡᠷ᠂ ᠬᠣᠨᠢ ᠪᠠᠨ ᠬᠣᠲᠠᠯᠠᠭᠤᠯᠤᠭᠰᠠᠨ ᠤ ᠪᠠᠨ ᠳᠠᠷᠠᠭᠠ ᠣᠶ᠋ᠢᠷᠠ ᠰᠠᠭᠠᠬᠠᠯᠲᠠ ᠶ᠋ᠢᠨ ᠬᠡᠦᠬᠡᠳ ᠵᠠᠯᠠᠭᠤᠴᠤᠳ ᠴᠤᠭᠯᠠᠨ᠂ ᠬᠣᠶᠠᠷ ᠪᠠᠭ ᠪᠣᠯᠵᠤ ᠬᠤᠪᠢᠶᠠᠭᠳᠠᠨᠠ᠃ ᠨᠢᠭᠡ᠂ ᠬᠣᠶᠠᠷ ᠬᠦᠮᠦᠨ ᠲᠣᠭᠯᠠᠭᠠᠮ ᠢ ᠵᠣᠬᠢᠶᠠᠨ ᠪᠠᠶ᠋ᠢᠭᠤᠯᠬᠤ᠂ ᠰᠢᠭᠦᠬᠦ ᠡᠭᠦᠷᠭᠡ ᠭᠦᠢᠴᠡᠳᠭᠡᠨᠡ᠃ ᠨᠢᠭᠡ ᠬᠦᠮᠦᠨ ᠴᠥᠭᠡᠯᠡᠳᠡᠭᠴᠢ ᠪᠣᠯᠵᠤ ᠬᠠᠷᠠᠩᠭᠤᠢ ᠳᠤ ᠭᠠᠵᠠᠷ ᠠᠴᠠ ᠢᠯᠭᠠᠷᠠᠵᠤ ᠬᠠᠷᠠᠭᠳᠠᠬᠤ ᠴᠠᠭᠠᠨ ᠥᠩᠭᠡ ᠶ᠋ᠢᠨ ᠮᠣᠳᠣ ᠠᠪᠴᠤ ᠨᠡᠯᠢᠶᠡᠳ ᠵᠠᠶ᠋ᠢᠲᠠᠢ ᠶᠠᠪᠤᠭᠠᠳ᠂ ᠮᠣᠳᠣ ᠶ᠋ᠢ ᠨᠢᠭᠡ ᠭᠠᠵᠠᠷ ᠰᠢᠳᠡᠴᠢᠬᠡᠭᠡᠳ ᠢᠷᠡᠨᠡ᠃ ᠢᠩᠭᠢᠭᠡᠳ ᠬᠣᠶᠠᠷ ᠪᠠᠭ ᠤᠨ ᠬᠦᠮᠦᠰ ᠪᠥᠭᠡᠮ ᠢᠶ᠋ᠡᠷ ᠢᠶ᠋ᠡᠨ ᠴᠠᠭᠠᠨ ᠮᠣᠳᠣᠨ ᠤ ᠡᠷᠢᠯ ᠳᠦ ᠭᠠᠷᠤᠨᠠ᠃ ᠴᠠᠭᠠᠨ ᠮᠣᠳᠣ ᠶ᠋ᠢ ᠣᠯᠤᠭᠠᠳ ᠠᠷᠭᠠ ᠵᠠᠯᠢ᠂ ᠬᠤᠷᠳᠤ ᠬᠦᠴᠦ ᠪᠦᠬᠦ ᠪᠣᠯᠤᠮᠵᠢ ᠪᠠᠨ ᠠᠰᠢᠭᠯᠠᠨ ᠶᠠᠮᠪᠠᠷ ᠨᠢᠭᠡ ᠠᠷᠭᠠ ᠪᠠᠷ ᠴᠥᠭᠡᠯᠳᠡᠭᠴᠢ ᠶ᠋ᠢᠨ ᠭᠠᠷ ᠲᠤ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠪᠠᠭ ᠲᠣᠭᠯᠠᠭᠠᠮ ᠳᠤ ᠬᠣᠵᠢᠨᠠ᠃ ᠭᠡᠬᠦ ᠳᠦ ᠪᠡᠨ ᠬᠠᠷᠠᠩᠭᠤᠢ ᠰᠥᠨᠢ ᠲᠣᠭᠯᠠᠵᠤ ᠪᠠᠶ᠋ᠢᠭᠠ ᠲᠤᠯᠠ ᠡᠷᠦᠰᠳᠡᠯ ᠥᠨᠳᠥᠷ᠃
ᠮᠣᠳᠣᠨ ᠤ ᠡᠷᠢᠯ ᠳᠦ ᠭᠠᠷᠤᠭᠰᠠᠨ ᠬᠦᠮᠦᠰ ᠮᠣᠳᠣ ᠶ᠋ᠢ ᠬᠠᠶ᠋ᠢᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠨᠢᠭᠡ ᠨᠢᠭᠡᠨ ᠢ ᠪᠡᠨ ᠠᠩᠬᠠᠷᠤᠯ ᠲᠠᠢ ᠠᠵᠢᠭᠯᠠᠵᠤ ᠶᠠᠪᠤᠨᠠ᠃ ᠮᠣᠳᠣ ᠶ᠋ᠢ ᠣᠯᠤᠭᠰᠠᠨ ᠬᠦᠮᠦᠨ ᠨᠥᠭᠥᠭᠡ ᠪᠠᠭ ᠶ᠋ᠢᠨ ᠬᠢᠨ ᠳᠤ ᠮᠡᠳᠡᠭᠳᠡᠯ ᠦᠭᠡᠢ ᠭᠠᠵᠠᠷ ᠠᠴᠠ ᠠᠪᠤᠭᠠᠳ ᠮᠡᠳᠡᠭᠳᠡᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠬᠣᠵᠢᠬᠤ ᠶ᠋ᠢ ᠪᠣᠳᠣᠨᠠ᠃ ᠮᠡᠳᠡᠭᠳᠡᠪᠡᠯ ᠬᠠᠷᠠ ᠡᠷᠴᠢ ᠪᠡᠷ ᠢᠶ᠋ᠡᠨ ᠭᠦᠶᠦᠨᠡ᠂ ᠪᠤᠯᠳᠠᠨᠠ᠂ ᠪᠠᠭ ᠤᠨ ᠬᠢᠨ ᠳᠤ ᠪᠠᠨ ᠳᠠᠮᠵᠢᠭᠤᠯᠤᠨᠠ᠂ ᠥᠷᠢᠰᠦᠯᠳᠦᠭᠴᠢ ᠳᠦ ᠪᠡᠨ ᠪᠠᠷᠢᠭᠳᠠᠪᠠᠯ ᠠᠯᠳᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠨᠣᠴᠣᠯᠳᠤᠨᠠ᠃ ᠪᠦᠷᠢ ᠵᠠᠷᠢᠮ ᠨᠢ ᠣᠯᠤᠭᠠᠳᠤᠢ ᠪᠠᠶ᠋ᠢᠵᠤ ᠣᠯᠤᠭᠰᠠᠨ ᠪᠣᠯᠵᠤ ᠭᠦᠶᠦᠨᠡ᠂ ᠬᠦᠮᠦᠰ ᠠᠷᠤ ᠠᠴᠠ ᠨᠢ ᠬᠥᠭᠡᠭᠡᠨᠡ᠂ ᠵᠢᠭᠤᠲᠠᠭᠠᠨᠠ᠃ ᠵᠠᠷᠢᠮ ᠨᠢ ᠥᠭᠡᠷᠡ ᠮᠣᠳᠣ ᠣᠯᠴᠢᠬᠠᠭᠠᠳ ᠲᠡᠷᠡ ᠶ᠋ᠢ ᠪᠡᠨ ᠪᠠᠷᠢᠭᠠᠳ ᠭᠦᠶᠦᠨᠡ᠂ ᠣᠷᠢᠯᠠᠨᠠ᠂ ᠬᠠᠰᠬᠢᠷᠤᠨᠠ᠂ ᠬᠦᠮᠦᠰ ᠢ ᠠᠯᠪᠠ ᠪᠠᠷ ᠬᠠᠭᠤᠷᠤᠨᠠ᠃ ᠵᠠᠷᠢᠮ ᠨᠢ ᠮᠥᠨ ᠭᠡᠵᠦ ᠪᠣᠳᠣᠭᠠᠳ ᠪᠥᠭᠡᠮ ᠶᠠᠭᠤᠮᠠ ᠪᠣᠯᠵᠤ ᠠᠪᠠᠴᠢᠵᠤ ᠥᠭᠭᠦᠲᠡᠯᠡ ᠨᠥᠭᠥᠭᠡ ᠮᠣᠳᠣ ᠨᠢ ᠪᠢᠰᠢ ᠪᠠᠶ᠋ᠢᠨᠠ᠃ ᠶᠡᠷᠦᠩᠬᠡᠢ ᠳᠦ ᠪᠡᠨ ᠬᠦᠴᠦᠲᠡᠢ ᠬᠤᠷᠳᠤ ᠲᠠᠢ ᠵᠠᠯᠠᠭᠤᠴᠤᠳ ᠲᠣᠭᠯᠠᠭᠠᠮ ᠤᠨ ᠭᠣᠣᠯ ᠳᠤ ᠲᠣᠭᠯᠠᠵᠤ ᠪᠠᠶ᠋ᠢᠳᠠᠭ ᠪᠣᠯ ᠵᠠᠷᠢᠮ ᠨᠢᠭᠡ ᠨᠢ ᠰᠢᠷᠦᠭᠦᠨ ᠥᠷᠢᠰᠦᠯᠳᠦᠭᠡᠨ ᠳᠦ ᠣᠷᠣᠬᠤ ᠦᠭᠡᠢ᠂ ᠬᠠᠷᠢᠨ ᠲᠡᠷᠡ ᠠᠪᠤᠭᠠᠳ ᠶᠠᠪᠤᠴᠢᠬᠠᠯᠠ᠂ ᠲᠡᠨᠳᠡ ᠪᠠᠶ᠋ᠢᠨᠠ ᠭᠡᠬᠦ ᠮᠡᠲᠦ ᠪᠡᠷ ᠬᠠᠰᠬᠢᠷᠤᠨᠠ᠃ ᠵᠠᠷᠢᠮ ᠨᠢ ᠪᠦᠷ ᠬᠠᠷᠠᠩᠭᠤᠢ ᠳᠤ ᠶᠠᠭᠤ ᠪᠣᠯᠤᠭᠠᠳ ᠥᠩᠭᠡᠷᠡᠭᠰᠡᠨ ᠢ ᠴᠤ ᠣᠶ᠋ᠢᠯᠠᠭᠠᠵᠤ ᠠᠮᠵᠢᠬᠤ ᠦᠭᠡᠢ᠃[3]
ᠴᠠᠭᠠᠨ ᠮᠣᠳᠣᠨ ᠤ ᠲᠥᠯᠥᠭᠡ ᠥᠷᠢᠰᠦᠯᠳᠡᠬᠦ ᠦᠶ᠋ᠡ ᠳᠦ ᠴᠤᠬᠢᠬᠤ᠂ ᠢᠰᠭᠦᠯᠬᠦ᠂ ᠥᠴᠢᠬᠦ᠂ ᠪᠣᠭᠣᠬᠤ᠂ ᠭᠦᠶᠦᠵᠦ ᠪᠠᠶ᠋ᠢᠬᠤ ᠳᠤ ᠨᠢ ᠳᠡᠭᠡᠭᠡᠳᠡᠬᠦ ᠵᠡᠷᠭᠡ ᠦᠢᠯᠡᠳᠦᠯ ᠢ ᠬᠠᠲᠠᠭᠤ ᠬᠣᠷᠢᠭᠯᠠᠨᠠ᠃ ᠡᠶ᠋ᠢᠮᠦ ᠦᠢᠯᠡᠳᠦᠯ ᠭᠠᠷᠭᠠᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢ ᠰᠢᠭᠦᠭᠴᠢᠳ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠯᠲᠠ ᠠᠴᠠ ᠬᠠᠰᠤᠳᠠᠭ᠃ ᠲᠡᠶ᠋ᠢᠨᠬᠦᠦ ᠬᠠᠰᠤᠭᠳᠠᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢᠨ ᠪᠠᠭ ᠨᠢᠭᠡ ᠭᠡᠰᠢᠭᠦᠨ ᠳᠤᠲᠠᠭᠤ ᠲᠣᠭᠯᠠᠬᠤ ᠳᠤ ᠬᠦᠷᠡᠨᠡ᠃
ᠡᠬᠢ ᠰᠤᠷᠪᠤᠯᠵᠢ[засварлах | кодоор засварлах]
- ↑ ᠮᠥᠩᠬᠡ-ᠢᠯᠠᠯᠲᠠ᠃ ᠲᠣᠭᠯᠠᠭᠠᠮ ᠨᠠᠭᠠᠳᠤᠮ᠄ ᠤᠯᠠᠮᠵᠢᠯᠠᠯᠲᠤ᠃ 2012/02/28. https᠄//national.blogmn.net/84010
- ↑ ᠮᠣᠩᠭᠣᠯ ᠬᠡᠯᠡᠨ ᠦ ᠶ᠋ᠡᠬᠡ ᠲᠠᠶ᠋ᠢᠯᠪᠤᠷᠢ ᠲᠣᠯᠢ᠃ 2016. https᠄//mongoltoli.mn/dictionary/detail/125707
- ↑ ᠶ᠋ᠣ᠊ ∙ ᠷᠢᠨᠴᠢᠨᠳᠣᠷᠵᠢ᠃ ᠮᠣᠩᠭᠣᠯ ᠤᠨ ᠬᠥᠷᠥᠩᠭᠡ ᠶ᠋ᠢᠨ ᠪᠢᠷᠵᠢ ᠶ᠋ᠢᠨ ᠠᠷᠠᠯᠵᠢᠶ᠋ᠠ ᠪᠣᠯ ᠴᠦ᠋ ᠬᠠᠶᠠᠬᠤ ᠲᠣᠭᠯᠠᠭᠠᠮ ᠶᠤᠮ᠃ 2011/11/29 https᠄//rentsendorj.wordpress.com/2011/11/29/%D0%BC%D0%BE%D0%BD%D0%B3%D0%BE%D0%BB%D1%8B%D0%BD-%D1%85%D3%A9%D1%80%D3%A9%D0%BD%D0%B3%D0%B8%D0%B9%D0%BD-%D0%B1%D0%B8%D1%80%D0%B6%D0%B8%D0%B9%D0%BD-%D0%B0%D1%80%D0%B8%D0%BB%D0%B6%D0%B0%D0%B0-%D0%B1