Wikibilig:Танилцуулга

Wikibilig чөлөөт нэвтэрхий толийн бэлгэ тэмдэг

Сонгодог монгол бичгээр гардаг шинжлэх ухаан танин мэдэхүйн сайн дурын чөлөөт нэвтэрхий толь wikibilig.MN нь сайн дурын оролцогчдын хамтын хөдөлмөрөөр бүтэж, хөгждөг. Хүссэн хэн бүхэн нийтлэл бичиж, бусад нийтлэлийг дэлгэрүүлэн баяжуулж, тэдгээрт илэрсэн алдааг засварлаж болно. Энэхүү веб талбарын үндсэн зорилгын нэг нь Монголд болон хилийн чанадад Монгол бичгийг сонирхож, эрчимтэй суралцаж байгаа өнөө үед Монгол Бичиг дээр баялаг контент хөгжүүлэхэд оршино. ЕБС-ийн 6-р ангид Монгол Бичиг заадаг тул үндэсний бичиг үсэгтээ тайлагдсан өсвөр үеийнхэнд эх бичгээрээ унших, уламжлалт бичгээрээ дамжуулан мэдлэгээ арвижуулах материал шаардлагатай. Ийм нөхцлийг бүрдүүлснээр өргөн олон нийтээрээ Монгол Бичигтээ суралцах, хэрэглэх дэм болж, Монгол Бичигт орчин цагийн мэдээлэл түгээх хэрэгсэл гэж хандах болно. Эдүгээ Wikibilig нэвтэрхий толь 150 орчим нийтлэлтэй болсон. Нийтлэлүүд нь одон орон сансар судлал, анагаах ухаан, хими, физик, биологи, технологи, геологи, газар зүй, эрх зүй, шашин, түүх, уран барилга, дүрслэх урлаг, хөгжим гэх зэрэг ангилалд багтаж байна. Шинэ сэдвүүд одоо байгаа ангиллуудаар хязгаарлагдахгүй, хэрэглэгчид өөр ангиллуудыг үүсгэж болно. Wikibilig чөлөөт нэвтэрхий толийн программ хангамжийг шинэчлэх хүрээнд визуаль эдитор суулгасан тул хэрэглэгчид нийтлэл бичих, хянан засварлахад ихээхэн хялбар дөхөм болж хөнгөвчлөгдсөн. Админ нар сүүлийн үеийн шинжлэх ухаан техникийн сэдвүүдийг хөгжүүлэхэд анхаарч байгаа. Хэрэглэгчдээс математик, байгаль, нийгмийн шинжлэх ухааны сэдвээр хувь нэмэр оруулахыг хөхиүлэн дэмжинэ. Wikibilig чөлөөт нэвтэрхий тольд шинэ нийтлэл оруулах хамгийн хялбар арга бол ᠰᠢᠨ ‍ᠡ᠋ ᠨᠡᠢᠢᠲᠡᠯᠡᠯ загвар дээр бичих юм. Түүнчлэн видео зааврын дагуу ажиллаж болно.

Wikibilig-ийн таних тэмдэг Соёмбо бичгийн Wi үсэг ба талбайн интегралын тэмдэг гэсэн хоёр үндсэн хэсгээс бүрдэнэ. Энэ хоёр тэмдэг нь дундын дүрс болох дугуй дээр огтлолцож байна. Wi үсэг нь Wikibilig нэрийн товчлол бөгөөд Соёмбо бичгээр илэрхийлсэн нь түүх, хэл шинжлэл, гүн ухаан зэрэг нийгмийн ухаануудыг төлөөлж байна. Интегралын тэмдэг нь математик, физик тэргүүтэй байгалийн шинжлэх ухаануудыг төлөөлж байна. Соёмбо бичиг ба математикийн тэмдгийг уялдуулан зангидсанаар мэдлэгийн бүх салбар харилцан шүтэлцээтэй болохыг бэлгэдсэн. Түүнчлэн Wikibilig нэвтэрхий толь нь мэдлэгийн бүх салбарыг хамрах болно гэдгийг илэрхийлсэн билээ. Математик интегралын тэмдэг нь Соёмбо бичгээр төлөөлсөн монгол туургатнуудын эв нэгдлийг бэлгэдэнэ. Соёмбо бичгийн W гийгүүлэгчийг i эгшгээр амилуулагч нум тэмдэг гүйцэд тавигдаагүй байдлаар зурагдсан нь Wikibilig нэвтэрхий толь тасралтгүй хөгжин төгөлдөржиж, агуулга нь арвижин дэлгэрсээр байхыг илэрхийлнэ.

Алсын хараа:

Нарны аймагт Монгол Бичгээр мэдлэг түгээнэ.

Уриа:

Их Монголын Их нэвтэрхий толь